Mark 6

Nasaret Kona Ila Jisas Tᵾk Mbuⱡ Ngurung

1Jisas murum kona ni wak ropa, elim nga mᵾi mang kona ila purum. Wote, elim nga kitip kᵾni wu ni kᵾⱡ, pep rok purung.

2Mowi kor ni kᵾn, Jisas ndi, wamp mbᵾ manga wingti kel ila, puⱡ mondpa, Got nga ik mbo inditim. Wamp puⱡi ila molk, Jisas nitim ik mbᵾ pilik, min ngᵾn mundᵾk, waldᵾk nᵾk mel, “Wu ei, ik mbᵾ nᵾl mba titim? Wu ei nga pilpa kungᵾndi kai ei, wamp nam ndi, mbo rundrum? Wote, uⱡ rᵾpndi mbᵾ, wu ei nambuⱡ etpa enim? 3Wu ei kamnda ni, amp Mariya kangᵾm ei ni wote, wu Jeims, Josep, Juras kᵾn Saimon wu kᵾⱡ nga ᵾngᵾn ei. Wote, elim nga kimᵾnᵾl amp kᵾⱡ, ya kona ila mormun ei ka!” Ei nᵾk, wamp nimbᵾ ndi, Jisas nga ik nitim nimbᵾ, tᵾk mbuⱡ ngurung.

4Jisas ndi, wamp nimbᵾ, kundpa nimba mel, “Painui wu ei, kona elpa mbila wamp mbᵾ ndi pora, tᵾk ou ndurmin. Wote, elim nga mᵾi mang kona ila wamp mbo mbᵾ kᵾn, elim nga tipam mamᵾl mbᵾ kᵾn, ᵾngᵾnᵾl kimᵾnᵾl na mbᵾ ndi, tᵾk ou ndui nandᵾrmin mon!” nitim.

5Jisas ni, uⱡ rᵾpndi mat ila, iti natᵾpa kᵾn, kui rurum wamp mat, elim nga ki ei ndi, wamp nimbᵾ ambuⱡnga kui nimbᵾ pora nitim. 6Wamp mbᵾ mondᵾk pili napilingina, Jisas ni kandpa, min ngᵾn mundrum.

Jisas Ndi, Elim Nga Kitip Kᵾni Wu 12 Ni Kᵾⱡ Kongun Numba Tᵾpa Mundrum

Wote, Jisas kona nimbila andpa, wamp nimbᵾ ik mbo inditim. 7Jisas ndi, elim nga kitip kᵾni wu 12 ni kᵾⱡ, wi ropa rukᵾr tᵾpa, wu nimbᵾ, raⱡ raⱡ nimba kᵾmp tᵾpa mundrum. Jisas ndi, wu ni kᵾⱡ, ronduⱡ ti ngurum ei, kur kit mbᵾ, tᵾk munding ei nga ronduⱡ ngumba nimba mel, “Enim ping ila, enim nga mel ti, tᵾk mek pi mon. Nombuⱡa mam puk ᵾmbᵾⱡing tᵾmbᵾⱡ ei mint. Rᵾng nuing ti mek pi mon ku. Wal kumbana kep mon ku. Wote, ku moni na ti, mek pi nᵾpᵾi mon ku! 9Kᵾmp rᵾk kᵾⱡ mondᵾk kᵾn, wote wal pᵾki elpa kat pendᵾk, mek pi nᵾpᵾi mon ku!” nitim. 10Wote, ik ti kundpa nimba mel, “Wamp nam ti ndi, enim rawe etpa tᵾm wamp ei nga manga ila mint pek molk kᵾn, wote kona ei wak rᵾi! 11Wote, enim kona peng mat ila wangina, wamp mat ndi, enim numan nganggᵾk, rawe etᵾk rᵾk ti natᵾk, enim nga ik kai ei, kum ti natᵾng ndam, kona ei wak rok, enim nga kᵾmp kᵾnggᵾpᵾn mbᵾ, ndanda nduk, tek kelik pᵾi! Uⱡ ei ndi wamp mbᵾ ora nduk, enim nga uⱡ kit mbᵾ, en enim kᵾn petᵾm,” nitim.

12Kitip kᵾni wu ni kᵾⱡ ekit puk, wamp mbᵾ, ik mbo endᵾk, enim nga uⱡ kit mbᵾ, wak rᵾi! nᵾtᵾng. 13Wu kᵾⱡ ndi, kur kit murum wamp puⱡi nga kor kit murum mbᵾ, nᵾk tᵾk mundᵾk, kui rurum wamp puⱡi kopung ndi kandᵾⱡngina, wamp mbᵾ nga kui mbᵾ, wang nitim.

Jon Wamp Nu Tindi Wu Ni Kurum

14Wu nuim mumuk Erot ni, uⱡ nimbᵾ pora pitim. Ei Jisas nga mbi ni, ya uⱡ itim mbᵾ nga kona nimbᵾ ila, pora pilik kapⱡa endᵾtᵾng. Wote, wamp mat ndi, nᵾk mel, “Jon wamp nu tindi wu ni koⱡpa, rut nim nᵾtᵾng. Ei nambuⱡ emel, wu ei ronduⱡ tᵾpa kᵾn, uⱡ min ngᵾn pi mbᵾ enim,” nᵾtᵾng.

15Wote, wamp mat ndi, ko tᵾk nᵾk mel, “Wu ei Ilaija,” nᵾtᵾng. Wamp we mbᵾ ndi, nᵾk mel, “Wu ei painui wu, ya unt painui wu mat morung mbᵾ nga ti,” nᵾtᵾng.

16Wote, king Erot ni, ik nᵾtᵾng nimbᵾ, pilpa nimba mel, “Wu ei Jon wamp nu tindi wu ni, nᵾmp pᵾnt ei ka! Ya na ndi rop peng ei puⱡa rur wu ni, aldpa koⱡpa yant omba kont morum,” nitim. Erot elim ndi nilinga, Jon imp morung. Wote Erot ndi, Jon kan ropa tᵾpa kan manga ila kan ngurum. Erot uⱡ kᵾⱡ itim, ei nambuⱡ emel, amp Erotiyas ei elim nga ᵾngᵾn wu Pilip nga ambᵾm ei manggᵾpa titim. Wote, amp ei ndi, Jon numan ngui ngᵾnggᵾrᵾm. 18Uⱡ ila, Jon ndi rᵾk rᵾk Erot kundpa nimba mel, “Nim ndi, nim nga ᵾngᵾn nga amp ei tᵾk, ropᵾl rokᵾn tin uⱡ ei nga, kapⱡa mon!” nitim.

19Wote, Erotiyas nga numan orunga, Jon ei numan ngui nganggᵾpa, rop kundimp nimba pitim. Ei nga wote, rui narᵾrᵾm uⱡ ei, nambuⱡ emel, king Erot ndi, wu ei numan minal ngurum ei nga kandpa itim. 20Erot ni, Jon nga mundmong inditim. Ei nambuⱡ emel, Erot elim pitim ei, Jon ei wu kai, uⱡ kun kai mbᵾ mint itim ila, elim ndi, Jon tᵾpa rᵾpᵾndrᵾm. Erot ndi, Jon nga ik ei, kum timp mint nimba pitim. Ik kᵾⱡ ndi, Erot etpa numan minal nguⱡnga, wote pilpa kelpa, numan kai pilpa, rᵾk rᵾk Jon nga ik ei, kum mint titim.

21Wote, amp Erotiyas ni, Jon romba pilpa nombuⱡa mam ti kandpa titim. Ei king Erot nga metᵾng ui ei, ekit urum ei kᵾn, Erot ndi, rᵾng mam ti kaⱡpa, elim nga gapman wu ou mbᵾ kᵾn, elim nga el wu mbᵾ kᵾn, wote Galili kona ila nga wu ou mbᵾ, rᵾng mundpa, “Wᵾi!” nitim.

22Wote, amp Erotiyas nga mbuⱡam omba wᵾlt ropa itim ila, Erot nga wamp orung nimbᵾ pᵾkᵾ kandᵾk, numan ndi korung. Wote, wu nuim Erot ni ndi, ambuⱡa ni kundpa nimba mel, “Nim namba mel ti numan mondᵾp timp nᵾkᵾn pᵾn? Na ndi, nim numan mondkᵾn nin mel ei, nim nguimp mint,” nitim. 23Ik mong ronduⱡ mbᵾ nga ou ndupa, Erot ndi, mi tepa ambuⱡa ei, kundpa nitim, “Na mi tent ei, nim namba mel ti, nim numan mondkᵾn wuldᵾn ei nguimp mint. Wote, ya na nga tᵾpa mumuk rui kona ei, rᵾk ila oi ndup orunga nim nguimp ku!” nitim.

24Wote, ambuⱡa ni pena mba, elim nga mam ni, waldpa kᵾn, “Na namba mel ti ngangga namp?” nitim. Mam ndi, kundpa nimba mel, “Jon wamp nu tindi wu ei nga peng,” ei nitim.

25Ambuⱡa ni, tᵾkrᵾpa yant omba kᵾn, king ni, waldpa nimba mel, “Na Jon wamp nu tindi wu ei nga peng ei, numan mondunt. Nim ndi, akup ant ila mendpᵾⱡ, plet tila rᵾk ndukᵾn, mek okᵾn ngui!” nitim.

26Ik ei ndi, etpa wu mumuk ni, ama mbun ngurum. Ei wote, elim ndi, wamp rᵾng ruing ok, morung wamp mbᵾ, mi tepa nitim uⱡ ei ndi, ambuⱡa ei, kundpa mon nimba ei nga, nombuⱡa mam ti, ti nᵾtᵾtᵾm.

27Wote, king ni ndi, elim nga el wu ti tᵾpa mundpa, nimba mel, Jon nga peng ei, mekᵾn ui nitim. El wu ni, kan manga nila mba kᵾn, Jon nga peng ni, ropa koⱡmung itim. 28Wote, el wu ni ndi, Jon nga peng ni, plet ila mepa omba ambuⱡa ni nguⱡnga. Wote, ambuⱡa ni ndi, tᵾpa mam ni ngurum. 29Wote, Jon nga kitip kᵾni wu ni kᵾⱡ ndi, Jon rorung ik ei pilik kᵾn, wu kᵾⱡ ok, Jon nga on ei, tᵾk mek puk, wamp on kona tila on etᵾng.

Jisas Ndi, Wamp 5000 Rᵾng Itim

30Jisas elim nga kitip kᵾni wu ni kᵾⱡ, andᵾk yant ok, en enim uⱡ etᵾng mbᵾ kᵾn, wamp ik mbo rondᵾk etᵾng nimbᵾ mel, Jisas kondᵾk nᵾtᵾng. 31Kona ila wamp ama puⱡi ok, puk mint etᵾng ila, Jisas kᵾn elim nga kitip kᵾni wu kᵾⱡ kᵾn, muⱡ tᵾk rᵾng nok i iti natᵾtᵾng. Wote Jisas ndi, elim nga kitip kᵾni wu ni kᵾⱡ, kundpa nimba mel, “Tᵾn akup kona waka tila, tᵾn tᵾn mbun kᵾn, en enim muⱡ teing,” nitim. 32Wote, wu ni kᵾⱡ, nu kanu ni kᵾⱡ ila, en enim mint kona waka nila purung.

33Wamp minal ndi, wu purung kᵾⱡ, wu namin nᵾk, kandᵾk poⱡ ndᵾmin nᵾk, kona peng elpa elpa mbila wamp ok. Jisas kᵾn elim nga kitip kᵾni wu kᵾⱡ kᵾn, uing kona ila elpa elpa kuimp tek puk, nokundᵾk morung. 34Wote Jisas ni, nu kanu ila ekit omba kᵾndrᵾm mel, wamp minal ok morung. Wamp nimbᵾ kanduⱡnga mel, elim nga mundmong orunga kont minal itim. Nambuⱡ emel, wamp kᵾⱡ ya kng sipsip na ti, rᵾp wu mon etᵾm ni mel, etᵾk mormin kant ei ka, nimba pitim. Wote, ila moⱡpa kᵾn, wamp mbᵾ ik puⱡi mbo inditim. 35Wote, kona ant ei mana puⱡnga, elim nga kitip kᵾni wu ni kᵾⱡ ndi ok, Jisas kundᵾk nᵾk mel, “Kona ant ei mana pum ei ka. Wote kona ila, wamp kat kep, pi napᵾtmin kona kui waka ei nga, wamp mbᵾ pᵾi nᵾkᵾn mundi. Wamp mbᵾ pᵾi nana puk, kongun kona na, wamp pek eng kona nondpa tem mat ila, puk rᵾng na mat, rarᵾp rok kandᵾk tᵾk neing,” nᵾtᵾng. 37Jisas ndi, punt ropa nimba mel, “En enim ndi, wamp mbᵾ rᵾng mat ngᵾi!” nitim. Wote, wu nimbᵾ ndi, int nduk waldᵾk nᵾk mel, “Nim ndi, tᵾn kapⱡa ku moni 200 kina mel wak ropᵾn, bret tᵾpᵾn, wamp mbᵾ ngamina, nuing nᵾkᵾn pilkᵾn nᵾn ei?” nᵾtᵾng. 38Wote Jisas ndi, wu kᵾⱡ waldpa nimba mel, “Enim bret namba iti tek mormun? Puk kᵾnᵾi!” Wote, wu ni kᵾⱡ ndi, kandᵾk kᵾn, Jisas kundᵾk nᵾk mel, “Bret tᵾmbᵾkak pᵾmp ti pip, omba oma raⱡ tetᵾm ei ka!” nᵾtᵾng.

39Wote Jisas ndi, elim nga kitip kᵾni wu ni kᵾⱡ kundpa nimba mel, “Wamp mbᵾ tᵾk mou elpa elpa rondᵾk, mana numa pana ila mana muⱡᵾi nᵾi!” nitim. 40Wote, wamp nimbᵾ 100 nᵾk, 50 nᵾk, mou rok elpa elpa morung. 41Wote Jisas ndi, bret ni kᵾⱡ kᵾn, oma ni raⱡ kᵾn, ambuⱡpa moⱡpa tᵾpa oⱡa ndupa, muⱡ ei kandpa, Got kᵾn angge nimba atinga rurum. Wote elim ndi, bret nimbᵾ, puk ropa tᵾpa, elim nga kitip kᵾni wu ni kᵾⱡ ngurum. Wu ni kᵾⱡ ndi, mek andᵾk, wamp mbᵾ ngurung. Wote Jisas ndi, oma ni raⱡ i ku etpa, puk ropa pendpa, wamp nimbᵾ ngurum. 42Wamp nimbᵾ pora, rᵾng nok kapⱡa endilingina, pᵾlᵾng uⱡ itim. 43Wote, kitip kᵾni wu ni kᵾⱡ ndi, bret na, oma na noⱡina, mana titim nimbᵾ, tᵾk kowᵾ wal 12 mel rok peka rondrung. 44Rᵾng ila molk norung ei, wu 5000 ei mel molk norung.

Jisas Nu Ndi, Pol Ila Oⱡa Ʉndᵾrᵾm

45Wote, rᵾng nok pora nduⱡungina, Jisas ndi, elim nga kitip kᵾni wu ni kᵾⱡ, tᵾpa nu kanu ni kᵾⱡ ila, rukᵾr ndupa kuimp tek Betseita kona num noi orunga ila, pᵾi nimba mundrum. Wote, elim moⱡpa, wamp nimbᵾ ndi, pᵾi nimba mundrum. 46Wu nimbᵾ pᵾi nimba mundpa kᵾn, Jisas ni, komnga tila oⱡa mba atinga rurum. 47Wote kona ni, epindama elinga, nu kanu ni kᵾⱡ, num rᵾk mil ila, kun purum ni kᵾn, Jisas ni, elim mendpᵾⱡ ya orunga mᵾi nila murum. 48Jisas ni, kᵾndrᵾm mel, elim nga kitip kᵾni wu ni kᵾⱡ morung. Nu kanu ni kᵾⱡ kᵾpkᵾ ndi, ropa noi ya elinga, tᵾp kun mundmin nᵾk etᵾng. Wote, kona rangimba pilpa, min titim ei kᵾn, Jisas ni, wu ni kᵾⱡ morung nila, nu ndi, pol ila oⱡa urum. Jisas ni nondpa omba, wuldᵾng mba elinga, wu ni kᵾⱡ ndi, kandᵾk nᵾk mel, “Kur ti!” nᵾtᵾng. Nᵾk pilik, kei nᵾtᵾng. 50Wote, wu nimbᵾ pora, Jisas kandᵾk mundmong etᵾng. Ni kᵾn, Jisas ndi, kundpa nimba mel, “Mundmong iti nᵾtᵾi! Na ont ei ka!” nitim. 51I nimba kᵾn, Jisas ni, elim nga kitip kᵾni wu kᵾⱡ, nu kanu morung ni kᵾⱡ ila, omba oⱡa puⱡnga, kᵾpkᵾ ni, tᵾngᵾnda mint kᵾr nitim. Ni kᵾn, kitip kᵾni wu ni kᵾⱡ ndi, Jisas kandᵾk kᵾn, rut nᵾtᵾng. 52Nambuⱡ emel, wu kᵾⱡ ndi, Jisas ukᵾ orunga, bret kᵾmp tᵾpa ngurum uⱡ ni, tᵾk mindi namindᵾtᵾng. Ei nambuⱡ emel, wu kᵾⱡ nga en enim nga numan orunga piral ni nᵾndᵾtᵾm.

Jisas Ndi, Genesaret Kona Ila Kui Wamp Mbᵾ Etpa Titim

53Wu ni kᵾⱡ num ni puⱡa rok, ya Genesaret kona orunga ok, nu kanu ni kᵾⱡ nu ila, kan kolk pendᵾtᵾng. 54Wote, wu ni kᵾⱡ, nu kanu ni kᵾⱡ, wak rok ekit orung ni kᵾn, wamp nimbᵾ ndi, Jisas ni unt kandᵾk poⱡ ndurᵾng. 55Wote wamp nimbᵾ, tᵾkrᵾk kona nimbila pora puk, en enim nga rupⱡaima ila, kui wamp nimbᵾ mek, Jisas kona nant ila murum pᵾtᵾng kona nila orung. 56Jisas wamp manga rᵾⱡaip anggᵾtᵾm kona mbila muna, kona peng kel mbila muna, pana kongun kona mbila muna, en enim nga kui wamp mbᵾ mek, mel rarᵾp kona mbila elpa elpa tek molk, Jisas waldᵾk, kui wamp kᵾⱡ ndi, Jisas elim nga muⱡ punt kᵾⱡ minda angina, ndᵾng ndam, wamp mbᵾ, nga kui mbᵾ wang nimba nᵾk pᵾtᵾng.